नेपालगञ्ज : काठमाण्डौमा जेनजी प्रदर्शनका क्रममा गत भाद्र २३ गते प्रहरीको गोलीबाट मृत्यु भएका जेनजी शहीदद्वय शुलभ र आयुषको नाममा नेपालगञ्जमा चोक र सडक नामाकरण गरिएको छ ।नेपालगञ्ज उपमहानगरपालिका वडानं १ का स्थायी बासिन्दा समेत रहेका जेनजी शहीदहरू ई.शुलभ श्रेष्ठ र आयुष थापाका नाममा वडाले मार्ग नामाकरणसहित गेट निर्माण गर्ने भएको हो ।
धम्बोझीको प्रहरी गुल्मबाट धम्बोजी वाटरपार्क जाने ठाउँमा शुलभ गेट निर्माण गर्दै सो सडकखण्डको गायत्री मन्दिरसम्मको बाटोलाई शुलभ मार्ग नामाकरण गर्ने र त्यस्तै खजुरारोड शिव मन्दिरदेखि विशालनगर चोकसम्मको बाटोलाई आयुष मार्ग नामाकरण गर्दै विशाल चोकमा आयुष गेट निर्माण गरिने निर्णय भएको वडा अध्यक्ष प्रमोद रिजालले जानकारी दिए ।वडा अध्यक्ष रिजालले वडा नम्बर १ को वडा समितिबाट निर्णय भइसकेको जनाउँदै उनले स्थानीय सरकारकै लगानीमा गेट निर्माण हुने बताए । जेनजी प्रदर्शनका क्रममा २३ गते प्रहरीको गोली लागेर गम्भीर घाइते भएका नेपालगञ्जमा शुलभ र आयुषको ट्रमा सेण्टरमा उपचारका क्रममा मृत्यु भएको थियो ।
